කුරුළු කතා

සමහර වෙලාවට පොඩ්ඩක් උවමනාවෙන් බැලුවාම වටපිටාවේ හරි අපූරු දේවල් නිරීක්ෂණය කරන්න පුළුවන්. දැන් ඔස්ට්‍රේලියාවට වසන්ත කාලේනේ. මේ දවස්වල අපේ ගේ වටේට කුරුළු කූඩු කීපයක්ම හදලා බව මම දැක්කේ අහම්බෙන්. මේවා ගෙදරටම සම්බන්ධ කරලා හදපු ඇනෙක්ස් වර්ගයේ ඒවා මිසක් ගස් වැල් වල හදපු ඒවා නෙමෙයි. ඒ වගේම මේවායේ ඉන්නේ එක කුරුළු ජාතියකුත් නෙමෙයි, විවිධ ජාතීන් කීපයක්. ඒ spotted dove, blackbird, mud lark කියන කුරුළු වර්ග බව ටිකක් පරීක්ෂාවෙන් බලද්දී මට පෙනුණා. මේ කූඩු වලින් දෙකක්ම අපිට අත දිග ඇරලා අල්ලන්න තරම් කිට්ටුයි, ඒ අතරින් blackbirds ලා නම් බොහොම එඩිතරව එයාලගේ ගේ හදලා තියෙන්නේ අපේ ගෙදර ඉස්සරහා දොරකඩම!  හැබැයි Mud lark කූඩුව තියෙන්නේ ගෙදර වහලෙයි වැහි පීල්ලයි අතරේ. ඒ කූඩුව පේන්නේ නැහැ, එයාලා එතැනට යනවා එනවා විතරයි පේන්නේ. කොහොමහරි මෙයාලා හරියට කතා වෙලා වගේ කලින් කවදාවත් නොවුණු විදිහට, එක සැරේ අපේ ගෙදර පදිංචි වෙලා.

කොච්චර වුණත් එයාලා අපේ ගෙදර නවාතැන් ගත්ත අමුත්තො නිසා මම මේ පවුල් කීපය ගැන හොයලා බලන වැඩේ බාර ගත්තා. එයාලාගේ කූඩු පැත්තේ වැඩිය ගැවසෙන්නේ නැතිව, bird bath එකේ නිතරම පිරිසිදු වතුර පුරවලා තියමින් මම මේ ටිකේ එයාලට සහයෝගය දෙනවා. එහෙම කල්පනාවෙන් ඉන්දැද්දී තමයි දවසක් වැහි පීල්ල අස්සේ කූඩු හදපු mud lark ජෝඩුවගේ බිත්තරයක් එයින් එළියට වැටිලා කියලා මම දැක්කේ. උඩ ඉඳන් වැටෙද්දී මගේ මල් පෝච්චියක් උඩට වැටුණු නිසා ඒක නොබිඳී බේරිලා. ඒක ලස්සන නිල් පාට පොඩි බිත්තරයක්. වහලෙට නගින්න බැරි නිසා බිත්තරය ආයෙත් කූඩුවෙන් තියන්නත් බැරිව, ඒකට මොකද කරන්නේ කියන ප්‍රශ්නෙට තමයි මම ඊළඟට මූන දුන්නේ. අන්තිමේදී ටිකක් කල්පනා කරලා  spotted dove ජෝඩුව අහල පහල නැති වෙලාවක් බලලා මම බිත්තරය එයාලගේ කූඩුව ඇතුලෙන් තිබ්බා. පුතා නම් මේ වැඩේට එකහෙලාම විරුද්ධ වුණා. එයා කීවේ මම කළේ unethical වැඩක්, dovesලා ඒ බිත්තරේ වෙනස් බව දැනිලා කූඩුවෙන් බිමට දායි කියලා. ඒත් ජීවත් වෙන්න වාසනාව තියෙනවා නම් වෙන කුරුළු පවුලක හරි ඒ mud lark කුරුළු පැටියා ලොකු වෙයි කියලා තමයි මම හිතුවේ. තාම නම් බිත්තරේ බිම දාලා නැහැ, spotted dove කිරිල්ලී මේ වෙද්දීත් ඔක්කොම බිත්තර ටික රකිමින් ඉන්නවා! තව ඉස්සරහට පියාඹන්න පුරුදු වෙන්න ගිහින් කූඩු වලින් වැටෙන කුරුළු පැටව් ගැන බලාගන්නත් මට රාජකාරි තියෙයි කියලා මම බලාපොරොත්තුවෙන් ඉන්නේ.

මගේ කාර්යාලයේ මිතුරියක් එක්ක මම හිනාවෙමින් කිව්වා මේ දවස්වල මට තියෙන අලුත් රාජකාරිය ගැන. ඈ නම් ඒක මට වැඩිය බැරෑරුම්ව අරගෙන ඊට වෙනස් අර්ථකථනයක් දුන්නා. "Birds nesting around your house represent new beginnings and the cycle of life. The universe is giving you a message!" ඈ කිව්වේ එහෙමයි. එහෙම හිතුවොත් එක අතකට ඒකත් හරි. අපේ පුතාත් එයාගේ ඉස්කෝලේ කාලේ ඉවර කරමින්, පියාඹන්න ලෑස්තිවෙන කාලයක් මේ ගෙවෙන්නේ. අපිත් ඉස්සර ඒ වගේම කූඩුවලින් පිටවෙන්න බලන් ඉන්න කාලයක් ගෙව්වා. අද ඊයේ වගේ දැනුණත් ඒ කාලේ පහුවෙලා දශකම කීපයක් ගෙවිලා. එහෙම බැලුවොත් ඇත්තටම මේ new beginnings, growth, cycle of life ගැන පුංචි පාඩමක් තමයි. අපිට එක සැරේ කුරුළු ගුරුවරු තුන්දෙනෙක්ම කියලා දෙන පාඩමක්! 

පින්තූරේ ඉන්නෙ අනුන්ගෙ බිත්තරයකුත් රකින dove කිරිල්ලිත්, දොරකඩම පදිංචි blackbird මහත්මියත්.