මාර්තු 01 2022- 5.43 am
ගැඹුරු නින්දක පතුලක සැරිසරමින් සිටි ලෝරන් හදිසියේ තිගැස්සී අවදි වූවාය. කවුළුවේ දුහුල් තිරයෙන් ඔබ්බෙහි පෙනුණේ අලුයමේ අළු පැහැති ලා එළියයි. මෑතක සිට අවේලාවට ඇහැරීමේ කරදරකාරී පුරුද්දක් ඇතිවී තිබූ බැවින් වේලාව දැනගැනීමට ඈට අවශ්‍ය විය. ඇඳ අසල නූස් මේසය මත ඇති තම ජංගම දුරකථනය අතට ගත් ලෝරන් එතෙකුදු පහ නොවූ නිදිමතින් එහි තිරය මත තම ඇඟිලි සලකුණ තැබුවාය.
Fingerprint not recognised, please try again
උපැස් යුවල පැළඳ නොසිටියත් තිරය මත කුඩා අකුරින් ලියවුණු වැකිය හැඳිනූ ලෝරන් කියවෙන්නට ආ නොසරුප් වදන ගිල ගත්තේ ආයාසයෙනි. මෑතකදී මිළදී ගත් මේ අලුත්ම මාදිලියේ ජංගම දුරකතනය තමන් සතු වූ දා පටන් මෙවැනි සුළු සුළු එදිරිවාදිකම් කරමින් සිටි නමුත් එය තම ඇඟිලි සලකුණ හඳුනා නොගත් පළමු වතාව මෙය විය. මේ අලුයම් හෝරාව එය සමඟ සටන් වැදීමට වෙලාව නොවන බව සිතූ ලෝරන් තමන්ට දුරකථනයට පිවිසෙන්නට ඉඩ නොලැබුණත් තිරය මත වෙලාව සටහන් වූ නිසා ඒ වෙත සරදම් සිනාවක් පෑවාය.
තව පැය කාලක් නිදාගැනීමට උත්සාහ කරන්නේද, නොඑසේ නම් පිබිදෙන්නේදැයි මොහොතක් සිතින් තර්ක කළ ඈ ඇඳෙන් නැගිට නාන කාමරයට වැදුණාය.
මාර්තු 01 2022- 6.30 am
කේතලය උතුරන තෙක් ලෝරන් නෙත් යොමා සිටියේ මහල් නිවාස සංකීර්ණයට ඔබ්බෙන් රන් පැහැතිව උදා වන හිරු දෙසයි. තවත් දවසක්, තවත් වැඩ කන්දරාවක්. ඈ අසුන්ගෙන සිටි සනීප පුටුවට ඔබ්බෙන් වූ වීදුරු බිත්තියෙන් බොහෝ පහත, මහා මාර්ගය පෙනුණේ තනි ඉරක් ලෙසිනි. එහි ඔබ මොබ යන වාහන කුඩා කෘමීන් ලෙස දුරට දිස් විය. ලෝරන් ගේ දැහැන බිඳුනේ වතුර උතුරන කේතලය නැඟූ උරුවම් හඬිනි. යාන්ත්‍රිකව මෙන් තම කෝප්පයට කෝපි හැන්දක් දමා උණු දිය වත් කළ ඈ, ශීතකරණයෙන් ගත් කිරි බඳුනෙන් කිරි ස්වල්පයක් ජෝගුවකට දමා මයික්‍රෝවේව් උදුනට දැම්මාය. උණුසුම් කෝපි කෝප්පයේ බලය සුන් කරන්නට ශීත කිරි තරම් තවත් දෙයක් නැති බව අත්දැකීමෙන් දැන සිටි ඇය කෝපි කෝප්පයට දමන්නට පෙර කිරි රත් කරන්නට නම් කිසි දිනෙක අමතක කළේ නැත. එහෙත් අද නම් මයික්‍රෝවේව් උදුන තම අණ හමුවේ නිදිගත්වනම පසුවිය. ලෝරන් කෙතරම් එහි යතුරු පුවරුව මත තම ඇඟිලි තුඩු දිවවූවත් ඊට පණ ආවේ නම් නැත. තම නිවස වෙත ලැබෙන විදුලි සැපයුම තවමත් ක්‍රියාත්මක බව සැක හැර දැනගත් ලෝරන් කිහිප වරක් උත්සාහ කිරීමෙන් පසු කිරි රත් කරගැනීමේ උත්සාහය අත් හැරියාය. ඈට මෙවැනි සිල්ලර දේ ගැන වද වන්නට වෙලාව තිබුණේ නැත. ශීත කිරි බඳුනෙන් ස්වල්පයක් උණුසුම් කෝපි කෝප්පයට වත් කර ගත් ඈ අපුලෙන්ම ඉන් උගුරු කිහිපයක් බී නිදන කාමරය වෙත ගියේ කාර්යාලය වෙත යාමට සූදානම් වීමටයි.
මාර්තු 01 2022- 7.10 am
විදුලි සෝපානය අසල සිටියේ වෙනදාට මේ වෙලාවට දකින්නට ලැබෙන සුපුරුදු කණ්ඩායමමය. තට්ටු හැට අටක් උස මේ සුඛෝපභෝගී මහල් නිවාස සංකීර්ණයේ විසි හතරවෙනි තට්ටුවේ ලෝරන් පදිංචියට ඇවිත් මේ ගෙවෙන්නේ සිව් වෙනි වසරයි. මෙය තොරාගනිද්දී එහි අති නවීන පහසුකම් ඇයගේ සිත් ගත්තේය. ගොඩනැගිල්ලේ බිම් මහලටත් පහතින් ඇති රථ ගාලේ තමන් නමින් ඉඩක් වෙන්කරගන්නට ඉඩ ලැබීම නිසා තමන් එහි සෙසු වැසියන්ට වඩා වාසනාවන්ත බවක් ඇය සැලකුවාය. දැන් නම් මුදල් ගෙවා වුව එවැනි අවස්ථාවක් ලැබෙන්නේ නැත.
සෝපානය එළැඹි විට ඊට ගොඩ වූ අනෙත් සියලු දෙනා බිම් මහලේ පිවිසුම් ශාලාව හරහා මාර්ගයට යාමට නියමිත බැවින් එහි සිටි එක් අයෙක් එහි විදුලි පුවරුවේ බිම් මහලට අදාළ G අකුර ස්පර්ශ කළේය. ලෝරන් පමණක් තම රථය ගාල් කර ඇති පහතම මාලයට යාමට Basement සඳහා ඇති B අකුර ස්පර්ශ කළේ අද දවසේ කරන්නට නියමිත රාජකාරී රැස මනසේ පෙළගස්වා ගනිමිනි. එහෙත් කොතෙක් ස්පර්ශ කළත් සෝපානයේ විදුලි පුවරුවේ B අකුර දැල්වුණේ නැත. ලෝරන් ගේ සිතේ තෙරපී නැඟුණේ නොරිස්සුමකි. මේ ගොඩනැඟිල්ලේ නඩත්තුව සඳහා එහි සෙසු වැසියන් මෙන්ම ඇයත් විශාල මිළක් ගෙවද්දී සෝපානයක් වැනි අත්‍යවශ්‍ය සේවාවක් හරියාකාරව පවත්වා ගැනීමට පරිපාලනයට නොහැකිද? හවස් වරුවේ මෙහි පරිපාලන කාර්යාලය වෙත ගොස් මේ ගැන පැමිණිල්ලක් කිරීමට ඈ සිතේ සනිටුහන් කර ගත්තාය. සෝපානයේ සෙසු සාමාජිකයින් තමන්ට සිදු වූ ඇබැද්දිය දුටුවේදැයි හොරැහින් වටපිට බැලූ ලෝරන් දුටුවේ ඒ හැම කෙනෙක්ම තම ජංගම දුරකථන තිර වෙත ඔබාගත් මුහුණු වලින් යුතුව සිටි බවයි. ඔවුන් සමඟම බිම් මහළින් බට ඈ තරප්පුව ඔස්සේ තවත් මහලක් බැස රථ ගාල වෙත ගියේ වැඩුණු නොරිස්සුමෙනි.
මාර්තු 01 2022- 7.40 am
රථවාහන තදබදය අතරින් කාර්යාලය වෙත වාහනය පදවද්දී උදෑසනම කරදරකාරී ගනුදෙනුකරුවෙක් සමඟ හමුවක් ඇති බව සිහි වූ විට ලෝරන්ට දැනුණේ සිහින් හිසරදයක් මෝදු වන බවකි. තමන් ප්‍රිය කරන උදෑසන කෝපි කෝප්පයද හරියාකාරව රස විඳින්නට නොහැකි වීම මතකයට විත් තම සිත කේන්තියකින් පිරී යනු ඇයට දැනුණි. මෙවැනි සිත කැළඹුණු අවස්ථා වෙනුවෙන් ඈ තම රථයේ මෘදු සංගීත ඛණ්ඩ එකතුවක් ගබඩා කර තිබිණි. සාමාන්‍යයෙන් වෙනදාට විනාඩි දහයක් පමණ ඊට සවන් දුන් විට ඇගේ මනස සන්සුන් විය. ලෝරන් රථය ධාවනය කරද්දීම එක් අතකින් එහි ශබ්ද පුවරුවේ ගබඩා කර ඇති සංගීත ලැයිස්තු තෝරන්නට සූදානම් වූයේ අද මේ සහනය අත්‍යවශ්‍ය දිනයක්යැයි හැඟුණු බැවිනි. එහෙත් ඇයට ඊට අවස්තාවක් ලැබුණේ නැත. රථයේ ඩිජිටල් පුවරුව ලෝරන් ගේ අණ නොතකා නිසොල්මන්ව සිටියේ කිසිම ගරුසරුවක් නැති විලසිනි. කිහිප වරක් උත්සාහ කර ඒ අදහස අත්හැර දැමූ ලෝරන් කෙන්තියෙන්ම රථයේ ගුවන් විදුලිය ක්‍රියාත්මක කරන බොත්තම එබුවාය. එය නම් කිසිම විරෝධයක් නොපා ක්‍රියාත්මක වූයේ රුසියානු හමුදාවක් ගැන මහා විස්තරයකින් රථය පුරවාලමිනි. මනස සන්සුන් කරන සංගීතය සෙවූ තමන්ට අවසානයේ සිදු වූයේ මනස කැළඹෙන යුධ තොරතුරු ඇසීමට බව වැටහුණු ලෝරන් නොරිස්සුම් හඬක් පිටකරමින් ගුවන් විදුලිය ක්‍රියා විරහිත කළාය.
මාර්තු 01 2022- 8.10 am
තම කාර්යාලය ඇති මහලට දිවෙන විදුලි තරප්පුව මතින් ගමන් කරමින් සිටියදී ලෝරන් නැවත වරක් තම ජංගම දුරකථනය සුරතට ගත්තේ අද දිනයේ ඇති රැස්වීම් ආදියෙහි වෙනසක් සිදුවූ බවට ඊ මේල කිසිවක් ලැබී ඇත්දැයි දැනගැනීමටයි. උදෑසන 8.30ට කරදරකාරී ගනුදෙනුකරුවා සමඟ ඇති හමුව අහෝසි වී තිබෙන්නැයි ඈ සිත යටින් ප්‍රාර්ථනා කළාය.
Fingerprint not recognised, please try again
මෙවර නම් ඇයට තම අලුත්ම ජංගම දුරකථනය තරප්පුවෙන් පහළට වීසි කරන්නට සිත් විය. නැඟ එන කෝපය මැඩ ගත් ඈ දුරකතනයට පිවිසෙන්නට ඇඟිලි සලකුණ වෙනුවට යොදාගන්නා කේතය එහි අංක පුවරුවට ඇතුළු කිරීමට තැත් කළා ය. එහෙත් කෙතරම් උත්සාහ කළත් ඒ අංක කේතය එහි සටහන් වූයේ නැත. ලෝරන්ට තම කෝපය පාගාගෙන නැඟෙන සියුම් බියක් දැනෙන්නට විය. තම දුරකථනයට පිවිසෙන්නට නොහැකි වුවහොත් එහි ඇති සියලු දත්ත, පින්තූර, සෙසු දුරකථන අංක? ඒහෙත් ඒ ගැන සිතා තැවෙන්නට ඇයට වෙලාවක් තිබුණේ නැත. තව නොබෝ වෙලාවකින් ඇරඹෙන රැස්වීම වෙනුවෙන් තමන් සූදානම් විය යුතුය. දිවා කෑම පැයේදීවත් දුරකථන අලෙවි හලට ගොස් මේ අවුල විසඳාගත යුතු බව ඉටා ගනිමින් ඈ තම කාර්යාලයට පිවිසුණාය.
මාර්තු 01 2022 - 10.32 am
ගනුදෙනුකරු සමඟ උදෑසනම යෙදී තිබුණු රැස්වීම බාධාවකින් තොරව ඇරඹිණි. එහෙත් සියල්ල අවුල් වන්නට වූයේ රැස්වීම අරඹා ටික වේලාවකින් සාකච්ඡාවට අදාළ ලියකියවිලි කිහිපයක් පිටපත් කරගැනීමට ඡායාපිටපත් යන්ත්‍රය වෙත ඇය ගිය විටයි. ඈ එතැනට යද්දී හොඳින් ක්‍රියාකරමින් තිබුණු බව සියැසින් ම දුටු යන්ත්‍රය ඇයගේ වාරය පැමිණි විට ඇගේ අණ පිළිපැද්දේ නැත. යන්ත්‍රයේ ඩිජිටල් පුවරුව මත කෙතරම් තම අතැඟිලි දිවූවද ඉන් කිසි ප්‍රතිචාරයක් නොලැබිණි. නැඟී එන නොසන්සුන්කමින් යුතුව ඈ යන්ත්‍රය වෙත පා පහරක්ද එල්ල කළාය. ඒ අසලින් ගිය කාර්යාල සගයෙක්ගේ මැදිහත් වීමෙන් ඒ ඡායා පිටපත් ටික යන්තමින් ලබාගන්නට ඇයට හැකිවිය. තමන් දුන් අණට කිසිදු ප්‍රතිචාරයක් නොදැක්වූ යන්ත්‍රය ඔහුගේ අණට වහාම ක්‍රියාත්මක වන අයුරු ඈ බලා සිටියේ කෝපයෙනි. උපකාරය අවසානයේ ඒ සගයා තමන් දෙස හෙලුවේ ‘මෙවැනි සුළු කාර්යයක්වත් තනිව කරගනු නොහැකිදැයි’ අසන වර්ගයේ අමුතු බැල්මකි.
ඇය නැවත කාර්යාලයට පිවිසුණු විට ගනුදෙනුකරුවා බෙහෙවින් කෝප ගැන්වී සිටි අතර තමන්ගේ වටිනා කාලය නොසැලකිලිමත් ලෙස අපතේ හැරීම පිළිබඳව ඇයට තදින් දොස් පැවරූ ඔහු යන්නට ගියේ ආ කාර්යයද අවසන් නොකරමය. උදෑසනම සිදු වූ මේ කලබලය නිසා කැලඹුමට පත්ව සිටියත් ලෝරන්ට වැඩි වෙලාවක් ඒ ගැන තැවෙන්නට ඉඩ ලැබුණේ නැත. ඉනික්බිති යෙදී තිබුණේ කාර්යාල ප්‍රධානියා සමඟ හමුවකි. ඒ සඳහා කාර්යාලයේ ලේඛන ගබඩාවෙන් පැරණි නීති පිටපත් කිහිපයක් ගෙන යා යුතුය. ලෝරන් කොරිඩෝව ඔස්සේ පය ඉක්මන් කර ගමන් කළාය. තමන් තවමත් උදෑසන ආහාරය නොගත් බව ඇයට සිහි වූයේ ඒ වෙද්දී තියුණු වූ හිසරදය නිසායි. එහෙත් දැන් ඊට වෙලාවක් නැත. ලේඛන ගබඩාවට එළඹෙන තැන ඇති ආරක්‍ෂිත දොර අසල නතර වූ ඇය ඊට ඇතුල්වීමට අදාළ කේතය එහි සටහන් කළාය. මුළු කර්යාලයෙන්ම මේ ගබඩාවට පිවිසුමට අවසර තිබුණේ ඇයටත් කාර්යාල ප්‍රධානියාටත්, සහකාර ප්‍රධානියාටත් පමණි. කේතය ඇතුළු කරද්දී වෙනදා නැඟෙන සියුම් හඬ නොඇසෙන බව හදිසියේම වැටහුණු විට ලෝරන් ගේ සිරුර අප්‍රාණිකව යන බවක් ඇයට දැනුණි. වේගවත් වූ හුස්ම සන්සුන් කරගැනීමට උත්සාහ කරමින් ඈ නැවතත් දොරෙහි ඩිජිටල් පුවරුව දෙස පරීක්ෂාකාරීව බැලුවාය. ඒ මත කේතය සටහන් කිරීමට ඇඟිලි දුවවද්දී ඉන් ඇගේ ස්පර්ශය හඳුනා නොගැනෙන බව ඇයට වැටහිණි. තම ඇඟිලි තුඩු දෙස වුවමනාවෙන් බැලූ ලෝරන්ට එහි කිසිදු වෙනසක් පෙනුණේ නැත. නැවත නැවතත් දොර විවර කරගැනීමට කේතය ඇතුළු කරන්නට උත්සාහ කළද එය නිරර්ථක බව ඇයට නොබෝ වෙලාවකින් වැටහිණි. කාර්යාලයේ ප්‍රධානියා වන වෝකර් මහතා සමඟ රැස්වීමට ඉතිරිව තිබුණේ තව විනාඩි පහක් පමණි. ඔහු හමුවීමට ගොස් අදාළ ලියකියවිලි ගොනුව ලියකියවිලි ගබඩාවෙන් ගෙන එන්නැයි ඔහුට කිව නොහැක. ලෝරන් පත්වූයේ මහත් අපහසුතාවයකටය. ඇගේ සිරුර දහදියෙන් තෙත් විය. ඉක්මන් කේන්තිකරුවෙක් වූ වෝකර් උදෑසනම කෝප ගැන්වුවහොත් ඇයටත් කාර්යාලයේ සෙස්සන්ටත් දවසම මුස්පේන්තු වනු නොඅනුමාන ය. හදිසියේම ඒ මොහොතේ කාර්යාලයේ උප ප්‍රධානියා වන වින්ස්ටන් එතැනින් ගියේ ඇගේ වාසනාවකටය. ඔහු ද රැස්වීම සඳහා ප්‍රධානියාගේ කුටිය වෙත යමින් සිටියේය. වෝකර් මෙන් නොව වින්ස්ටන් විනෝදශීලී කුළුපග අයෙකි.
“මිස්ටර් වින්ස්ටන්, කරුණාකරලා ගබඩාවෙන් ජේ බී නඩුවේ ෆයිල් ටික ගන්න මට උදවු කරනවද? මොකක්ද හේතුවකට අද මගේ මොළේ බ්ලෑන්ක් වෙලා, මට දොරේ කෝඩ් එක මතක් වෙන්නෙම නැහැනේ!”
ආයාසයෙන් මවාගත් සිනහවකින් යුතුව ලෝරන් ඔහුගෙන් ඉල්ලා සිටියාය.
“ලෝරන්ට අමතකත් වෙනවා? මට නම් එහෙම විපර්යාසයක් හිතාගන්නත් බැහැ, එහෙනම් ඉර අනිත් පැත්තෙන් පායයි!” සුපුරුදු ලෙස විහිළුවෙන්ම පිළිතුරු දුන් වින්ස්ටන්, කේතය යොදා ගබඩාවේ දොර හැර අදාළ ලේඛන ගොනුව සොයාගැනීමට ලෝරන්ට උදවු කළේය.
මාර්තු 01 2022- 12.24 pm
තම කාර්යාලීය ගොඩනැගිල්ලේම බිම් මහලේ අවන්හලක කෙළවරම මේසයක ලෝරන් අසුන්ගෙන සිටියාය. ඇය ඉදිරිපසින් දුම් දමන පාස්තා බඳුනක් තිබුණද ඇය ඒ දෙස බැලුවේවත් නැත. බැලූ බැල්මට ඈ වෙතින් දිස් වූයේ රැකියාවේ දිවා විවේකයේදී ඉක්මන් ආහාර වේලක් ගැනීමට ආ කාර්යබහුල කාන්තාවකගේ දසුනකි. එහෙත් ලෝරන් මහත් කැළඹුමෙන් පසු වූවාය. දවසේ ඉතිරි භාගයේ යෙදී තිබුණු සියලුම රාජකාරී කාර්යයන් අවලංගු කළ ඈ කෙටි නිවාඩුවක් ගත්තේ තදබල හිසේ රදයක් ගැන කියමිනි. එහෙත් සැබෑම කරුණ නම් උදෑසන පටන් ඈට කරදර කළ හිස රදය මේ වෙද්දී අතුරුදන් වී තිබීමයි. ඒ වෙනුවට ලෝරන්ව වෙලාගෙන තිබුණේ හුස්ම හිරකරවාලන භීතියකි. උදේ වරුවේ පටන් සිදු වූ සිදුවීම් එකිනෙක ඈ මනසේ පෙළ ගස්වා ගත්තේ ඒවායේ අර්ථය වටහාගනු පිණිසයි.
කුමක් හෝ අද්භූත හේතුවකට අද තමන්ගේ ස්පර්ශය ඩිජිටල් පුවරු හඳුනා නොගන්නා බව දැන් ඇයට සහතිකය. වරින් වර දුරකථනයේ තිරය මත අතැඟිලි තැබීමෙන් ඇයට එය තහවුරු කරගත හැක. උදෑසනදී මේ බව නොවැටහුණත් ජංගම දුරකථනයත්, නිවසේ මයික්‍රෝවේව් උදුනත්, විදුලි සෝපානයත්, තම මෝටර් රථයේ ශබ්ද පුවරුවත් තමන්ට ප්‍රතිචාර නොදැක්වූයේ මේ හේතුවෙනි. එහෙත් තමාට මේ ගැටලුව හරිහැටි වැටහුණේ කාර්යාලයේ ඡායා පිටපත් යන්ත්‍රයත්, ලේඛන ගබඩාවේ ඩිජිටල් දොර අගුලත් තමන්ට අවසඟ වූ විට බව ලෝරන්ට වැටහිණි. ඈ නැවතත් තම දසැඟිලි විදහා බැලුවාය. බැලූ බැල්මට ඒවායේ කිසි වෙනසක් නැත.
මේ සඳහා උපකාර ලබාගත යුත්තේ කාගෙන්දැයි සිතමින් ලෝරන් අහස පොලොව ගැටලුවාය. තමන්ට කිසිම ශාරීරික ආබාධයක් නොමැති නිසා වෛද්‍යවරයෙකුට කළ හැකි කිසිවක් නැත. තාක්ෂණික අංශයේ වියතෙක් හට තම ගැටලුව කීවත් ඔවුන්ට තමන්ගේ ස්පර්ශයේ ගැටලුව වෙනස් කළ නොහැක. ලෝරන්ට දැනුණේ මහත් පරාජිත බවකි. ඇගේ ජීවිතයේ කිසි දිනෙක මෙවැනි අසරණකමක් දැනී තිබුණේ නැත.
ඩිජිටල් ස්පර්ශය නොමැතිව කළ නොහැකි දේවල් මනසින් ලැයිස්තුගත කරන්නට ලෝරන් උත්සාහ කළාය. මේ තත්ත්වය යටතේ ඇයට සුපිරි වෙළඳ සැලකට කඩිමුඩියේ ගොස් භාණ්ඩ ලබාගෙන ස්ව-සේවා ක්‍රමයට මුදල් ගෙවා පිටවිය නොහැකි අතර ඒ වෙනුවට අයකැමි පෝලිම්වල රස්තියාදු විය යුතුය. නගරයේ බොහෝ තැන්වල ඇති, ඩිජිටල් යන්ත්‍රයක් හරහා මුදල් ගෙවන රථ ගාල් වෙත තම රථය ඇතුල් කළ නොහැක. දුම්රියක හෝ බස් රියක යන්නට භාවිත කෙරෙන මෙට්‍රෝ කාඩ් පතට පොදු තැන්වල ඇති මෙට්‍රෝ යන්ත්‍ර වලින් මුදල් ආරෝපණය කළ නොහැක. මේ හැම එකක්ම තබා ඇයට තම නිවස පිහිටි මහල් ගොඩනැගිල්ලේ සෝපානය පාවිච්චි කර තම නිවස වෙත යාමට නොහැක. කෙසේ හෝ නිවසට ගියත් තම නිවසේ ඇති උදුන්, රෙදි සේදීම් යන්ත්‍රය ඇතුළු බොහෝ විද්‍යුත් උපකරණ භාවිත කරනු නොහැක! ලෝරන්ට දැනුණේ මහත් වික්ෂිප්ත බවකි. තමන්ව අදිසි සිර කූඩුවක සිර කර ඇති බවක් ඇයට දැනෙන්නට විය. රැකියාවේ කාර්යබහුල බවත්, තනිව සිටීමට ප්‍රිය පෞරුෂ ස්වභාවයත් නිසා ලෝරන්ට සමීප මිතුරු මිතුරියන් සිටියේ නැත. එබැවින් මේ අපබ්‍රංස ගැටලුව පවසා උපදෙසක් ගන්නට කෙනෙක් ඇයට නොවීය. විස්තර කර කීවත් මෙය කිසිවෙක් විශ්වාස නොකරන වර්ගයේ විකාරයකි. ලෝරන්ට දැනුණු කැලඹුම නිසා ඇයට කෑ ගසා හඬන්නට සිත් විය.
අවසාන වරට තමන් සාර්ථක ලෙස ඩිජිටල් ස්පර්ශයක් කළේ කොයි වේලාවේදැයි සිහිගැන්වීමට ලෝරන් උත්සාහ කළාය. පෙර දිනයේ හවස රාජකාරී නිමවී විදුලි සෝපානයේ නැඟ විසි හතරවෙනි තට්ටුවේ තම නිවසට ගිය බැවින් ඒ වෙද්දී මේ ආබාධය නොතිබුණු බවට සහතිකය. ඇගේ රාත්‍රිය ගෙවුණේ කෙලෙසදැයි ඈ යළි ආවර්ජනය කළාය. රාත්‍රී ආහාරය ගනිමින් සිටියදී අසල්වැසි වයසක රිචඩ්ස් මහත්මියගේ පැමිණීම හැරෙන්නට පෙරදින රාත්‍රියේ වෙනත් විශේෂ කිසිවක් සිදු වූයේ නැත. තනිවම වෙසෙන රිචඩ්ස් මහත්මිය තදබල තනිකමකින් පෙළුනාය. ඈ නිතරම ලෝරන්ව කතාවට හසු කරගැනීමට මාන බැලුවත් ලෝරන් ඊට ගොදුරු නොවන්නට හැකිතාක් ප්‍රවේසම් වූවාය. පෙර දිනයේත් ඈ ලෝරන් සොයා ආවේ ඇගේ ටැබ් පරිගණකය ක්‍රියා නොකරන බව පවසමිනි. එදින දහවලේ තමන්ගේ හොඳම මිතුරිය වන සිල්වියාගේත් මෙවැනිම පරිගණකයක් මෙලෙසම ක්‍රියා නොකළ බවත් තමන්ට නොබෝ වෙලාවකින් තම මුණුබුරන්ට වීඩියෝ ඇමතුමක් ගන්නට ඇති බවත් ඒ නිසා මෙය ඉක්මණින්ම විසඳා ගත යුතු බවත් මහා හෑල්ලකින් කියමින් රිචඩ්ස් මහත්මිය ගෙට ගොඩ විය. එහෙත් ලෝරන්ගේ එකම ස්පර්ශයකින් ඒ ටැබ් පරිගණකය ක්‍රියාත්මක වෙද්දී ඇය සිනහව මැඬ ගත්තේ අපහසුවෙනි. අවධානය ලබාගැනීමේ උත්සාහය ව්‍යවර්ථ වූ නිසාදෝ රිචඩ්ස් මහත්මිය මොනවදෝ තනියම මුමුණමින් යන්නට ගියාය. ඉකුත් දවසේ සිදුවීම් සුපරීක්ෂාකාරීව විච්ඡේදනය කරමින් සිටි ලෝරන්ට ඒ තම අවසන් සාර්ථක ඩිජිටල් ස්පර්ශය බව වැටහිණි. රිචඩ්ස් මහත්මිය යන්නට ගිය පසු රූපවාහිනිය නිවා දමා ඇය ඇඳට ගිය අතර අද උදෑසන වන තුරු කිසිම ඩිජිටල් තිරයක් අතපත ගා තිබුණේ නැත. ලෝරන්ගේ සිතිවිලි ප්‍රවාහය එක්වරම නතරවිය. තමන් උපහාසයෙන් සැලකුවත් රිචඩ්ස් මහත්මියට සිදුව තිබුණේත් තමන්ට දැන් සිදුවී ඇති දේ නොවේද? ඈ ස්පර්ශ කරද්දී නොදැල්වුණු ඩිජිටල් තිරය තමන් වෙනුවෙන් දැල්වුණු අයුරු සිහිවෙද්දී සියුම් හිරියක් තම සියොළඟ වෙලාගනු ලෝරන්ට වැටහිණි. මෙය රිචඩ්ස් මහත්මියගේ ටැබ් පරිගණකයෙන් තමන් වෙත...
"මැඩම් තව මොනවා හරි ඕඩර් කරනවද...නැත්නම්?" වේටර්වරයෙක්ගේ හඬින් ලෝරන් නැවතත් මෙලොවට පිවිසුණාය.
මෙය වුවමනාවටත්ව වඩා වෙලාවක් අවන්හල්වල නිකරුණේ ගැවසෙන ගනුදෙනුකරුවන්ගෙන් ඒවායේ සේවකයන් අසනු ලබන පොදු ප්‍රශ්නයක් බව ලෝරන් දැන සිටියාය. තමා නොදැනුවත්වම මෙහි පැමිණ බොහෝ වේලාවක් ගතවන්නට ඇත. ඈ ඇණවුම් කළ පස්තා බඳුන ඈ ඉදිරිපස එලෙසම විය. තව දුරටත් මෙතැන කල් මැරීමෙන් පලක් නොවන බව තමන්ටම කියාගත් ලෝරන් තමන්ට තව කිසිවක් අවශ්‍ය නොමැති බවත් බිල ගෙන එන ලෙසත් සේවකයාට දැනුම් දුන්නේ මවාගත් බැරෑරුම්කමකිනි.
"මැඩම් ඕඩර් කළ කෑම වේල මේ ටැබ් එකේ තෝරලා මෙතැනින්ම ක්‍රෙඩිට් කාඩ් එකෙන් ගෙවන්න පුළුවන්. කලබල වෙලාවට ප්‍රධාන කවුන්ටරේ තදබදය අඩු කරන්න අලුතින් පටන් ගත්ත ක්‍රමයක් මේක." වේටර් තරුණයා ආචාරශීලීව කීවේය.
තවත් ඩිජිටල් පුවරුවක්! නැවතත් තම හුස්ම හිරවෙන බවක් ලෝරන්ට දැනුණි. එය මොහොතකට අතට ගත් ඈ ඒ මත ඇඟිලි දුවවා බැලුවේ ප්‍රතිචාරයක් ලැබේදැයි බැලීමටය. එහේත් තිරයේ කිසි වෙනසක් සිදු වූයේ නැත.
"එහෙම තෝරන්නේ නැතිව මට කාඩ් එකෙන් ගෙවන්න බැරිද?" ටැබ් පරිගණකය ආපසු දෙන අතරතුරදී තම කටහඬ වෙව්ලන්නට නොදී ඈ ඇසුවේ ආයාසයෙනි.
"කාඩ් එකෙන් ගෙවන්න නම් තියෙන්නේ එහෙම තමයි මැඩම්, කෑෂ් දෙනවා නම් මට කවුන්ටරේට අරගෙන ගිහින් රිසිට් එකක් ගෙනත් දෙන්න පුළුවන්" තරුණයා කීවේය.
"කෑෂ්? මගේ ළඟ කෑෂ් නැහැනේ, මම සාමාන්‍යයෙන් කෑෂ් පාවිච්චියක් නැහැ" ලෝරන් පිළිතුරු දුන්නේ සැලෙන දෙතොලිනි.
"ඒකට කමක් නැහැ මැඩම්, අතන තියෙනවා ඒ ටී එම් මැෂින් කීපයක්ම. මැඩම් කෑෂ් අරගෙන එන්න, මම බිල ලෑස්ති කරලා තියන්නම්."
ඒ ටී එම් මැෂින්! ඇයට මේ ඩිජිටල් උගුලෙන් ගැලවීමක සේයාවක් නොවීය. ලෝරන්ට දැනුණේ එක්වරම ලෝකය කළුවර වූ බවකි. තමා එක්වරම මේසයෙන් නැගිටිද්දී එය පෙරළී ගිය බව ඇයට දැනුණේ නැත. ඈ අවන්හලෙන් පිටතට දිව ගියේ යටි උගුරෙන් හඬක් නඟමිනි.
මාර්තු 01 2022 - 01.48 pm
හදිසියේ උමතුවෙන් මෙන් අවන්හලෙන් දිව ගිය කාන්තාව දෙස ලැරී නම් වේටර් තරුණයා බලා සිටියේ විවර මුවිනි. මේ වෙද්දී ඔහු මේ රැකියාවට පැමිණ ගතව තිබුණේ සතියක් පමණි. මේ සතිය ඇතුළත මීට කළින් නම් මෙවැනි සිදුවීමක් නොවූ බවට ඔහුට සහතික විය හැක. මේ අවන්හලට කෑම ගැනීමට බොහෝ විට ආවේ මේ ගොඩනැඟිල්ලේම කාර්යාලවල රැකියා කරන කාර්යබහුල වෘත්තිකයන්ය. ඔවුන් කිසිවෙක් මෙවැනි විකාර හැසිරීම්වල යෙදුණේ නැත.
ලැරී වටපිට බැලුවේය. මේ ඉහිරුණු කෑම ඉවත්කර බිම පිරිසිදු කළ යුතුය. මේ වෙද්දී අවන්හලට පැමිණි අලුත් ගනුදෙනුකරුවන්ගෙන් ඇනවුම් ගත යුතුය. ඒ සියල්ලටම සිටින්නේ ඔහු පමණි. කෑම පරක්කු වුවහොත් ගනුදෙනුකරුවන් පැමිණිලි කරන්නට ඉඩ ඇත. තමන් මේ වෙලාවේ කළ යුත්තේ කුමක්දැයි ලැරීට එක වරම සිතාගත නොහැකි විය. මුළුතැන්ගෙහි සිටින කෝකියන්ගෙන් උපදෙස් ගැනීම ඵලක් නැති බව ඔහුට වැටහිණි. කළමනාකරුද මෙහි එන්නේ හවස් වරුවේ පමණි. කළ යුත්තේ කළමනාකරුට දුරකථන ඇමතුමක් ගෙන මේ සිදුවූ ඇබැද්දිය කියා උපදෙසක් ගැනීමයි.
මේ වෙද්දීත් ඇනවුම් දෙන්නට නොසන්සුන්ව තමන් දෙස බලන ගනුදෙනුකරුවන් දෙස නොබලාම ලැරී තම ජංගම දුරකථනය සාක්කුවෙන් පිටතට ගත්තේය.
එහෙත් ඒ ඇමතුම ගන්නට ලැබුණේ නැත. ඇඟිලි සලකුණ තබා කීප වරක් පිවිසෙන්නට උත්සාහ කළත් ලැරීගේ ජංගම දුරකථන තිරයේ දිස් වූයේ එකම පණිවිඩයකි.
Fingerprint not recognised, please try again
-හෙල්මලී ගුණතිලක-
Photo - Pixabay
