කවියෙක් සමාව ඉල්ලයි

මා අතින් නොලියවුණු කවි ගැන

සමාව දෙනු මැන මට

උත්ප්‍රාසයෙන් අවුරා දැමූ
කේන්තියෙන් පාගා දැමූ
ආත්ම- ආරක්ෂාවට පිළිකෙව් කළ
බිය නිසා නොසලකා හළ
ඒ කවි සියල්ල ගැන

නොතේරුම්කමින්, බියෙන් අන්ධව
නොතැකුවෙමි ඒවා මම
ඒ නොලියූ කවි
දස අත මහා ඝෝෂා කර
දිවා රෑ මා සොයා ආ නමුත්

පළවා හැරියෙමි ඒ හැම
ඒවාට සැරසෙන්නට හැකිව තිබුණු වර්ණ
පළඳින්න ඉඩ නොදුන්නාට
මට සමාවෙන්න
අඳුරේ හෙලූ ඒවායේ මුහුණු ගැන
මට සමාවෙන්න
නොලියූ පද පේළි වෙතින් මිදෙන්නට
ඒ කවි එඩිතර වූයේ නැත

මා නිෂ්ක්‍රියව ගත කළ හැම පැයකදීම
නොසලකා හරිනු ලැබ
කවියක් මියගොස් ඇත

පරිවර්තනය - හෙල්මලී ගුණතිලක

A Poet asks for Forgiveness- Fay Zwicky

වසත් සුළඟ 30.03.2022
https://epaper.dinamina.lk/Home/ShareImage...

photo- Pixabay