නිශ්ශබ්ද ලෝකය

ලන්ඩන් කවිය - 2022 මාර්තු කලාපය 


මිනිසුන් එකිනෙකාගේ දෑස් දෙස
බලාසිටීම වැඩිකිරීමටත්
ගොළු අය සතුටු කිරීමටත්
එක් අයෙකුට දිනකට
හරියටම වදන් එකසිය හැට හතක්
නියම කර ඇත රජයෙන්

මා ඊට හොඳින් හැඩ ගැසෙමිනි
දුරකථනය නාද වූ විට
කිසිත් නොකියාම එය සවනත තබාගනිමි
අවන්හලේදී
ඇඟිල්ල දිගුකර පෙන්වා
සුප් ඇනවුම් කරමි

රෑ මැදියමේ දී
දුර වෙසෙන මා ප්‍රේමියට අමතමි
“අද මා පාවිච්චි කළේ වචන පනස් නමයයි.
ඉතිරිය ඉතිරි කරගත්තා ඔබ වෙනුවෙන්”
ආඩම්බරයෙන් පවසමි
ඈ පිළිතුරු නොදෙන විට
දැන ගනිමි මම
ඇගේ වදන් නිමා වී ඇති බව
ඉතින් මම ‘මා ඔබට ආදරෙයි’ යැයි
තිස් දෙකයි තුනෙන් එක් වරක්
හෙමින්, රහසෙන් මුමුණමි
ඉනික්බිති අප දෙදෙනා
දුරකථනය විසන්ධි නොකර
එකිනෙකාගේ හුස්ම හඬට
සවන් දෙමින් රැඳී සිටිමු


The Quiet World by Jeffery McDaniel

පර්වර්තනය- හෙල්මලී ගුණතිලක  

https://tinyurl.com/mr27tsp9