පෙරපාසල් පැංචන්ගේ පොත් කියවීමේ හපන්කම

මේ අවුරුද්දේ මුල මමත් මිතුරියන් කීපදෙනෙකුත් එකතුවෙලා පුංචි ව්‍යාපෘතියකට සම්බන්ධ වුණා. ඒ තමයි ලංකාවේ පෙර පාසල් කීපයක දරුවන්ට පොත පත ඇසුරු කරන්න පහසුකම් සලසන එක. සමහර වෙලාවට ලංකාවේ අර්ධ නාගරික ඒ වගේම ගම්බද ප්‍රදේශ වල දරුවන්ට පාසල් වයසට කලින් කතන්දර පොත් අත පත ගාන්න තියෙන අවස්තාව අඩුයි. පොත් වුවමනා වෙන්නේ දරුවන්ට හරියට කියවන්න පුළුවන් වුණාට පස්සේ කියලයි වැඩිමනත් දෙමව්පියෝ හිතන්නේ. මීට අමතරව පුස්තකාල වලත් ඒ වයසට ගැලපෙන පොත් නැතිම තරම්. අකුරු කියවලා තේරුම් ගන්න පුළුවන් වෙන්න කලින්, පොත් වල පින්තුර බලලා, වැඩිහිටියෙක් ඒ කතන්දර කියවනවා අහගෙන ඉඳලා පොත් වලට ආදරයක් ඇතිකරගන්න පොඩ්ඩන්ට ලොකු ඉඩකඩක් තියෙනවා.

1000 Books Before School කියලා ඕස්ට්‍රේලියාවේ වික්ටෝරියා ප්‍රාන්තයේ ක්‍රියාත්මක කෙරෙන වැඩසටහනක් දැකලා මීට මාස කීපෙකට කලින් මම පුංචි fb සටහනක් ලිව්වා. මේ සටහන හරහා මීට අවුරුදු කීපයකට කළින් මේ විදිහටම හිතුව මගේ මිතුරියක් වන ශෂී සූරියආරච්චි අක්කා පොළොන්නරුවේ ගල්ලෑල්ල ප්‍රදේශයේ සිඟිති පෙරපාසලේ ගුරුවරිය සුජානි මිරහවත්ත එක්ක මේ වගේ වැඩසටහනක් ආරම්භ කරලා තිබුණු බව මට දැනගන්න ලැබුණා. ඒ පෙර පාසලේ දරුවන්ට ගැලපෙන පොත් එකතුවක්, ඒවා ගබඩා කරන්න අල්මාරියක්, දරුවෝ පොත් ගෙවල් වල අරගෙන ගිහින් දෙමව්පියෝ එක්ක කියවීම සටහන් කරගන්න හැමෝටම ලබාදෙන පුංචි පොත් පිංචක් මීට ඇතුළත් වුණා. 2021 මුලදී ශෂී අක්කාගේත් සුජානිගේත් මේ වැඩසටහනට අපි තව කීප දෙනෙක් එකතුවෙලා පොලොන්නරුවේම තවත් පෙරපාසල් කීපයකට මේ පහසුකම සලසලා දුන්නා. මුල ඉඳන්ම මේ පුංචි දරුවෝත් එයාලගේ වැඩිහිටියොත් මේ වැඩසටහනට උපරිම සහයෝගය දුන්නු බවයි ආරංචි වුණේ. කොරෝනා කාලේ පෙර පාසල් සැසි පවත්වන්න සෑහෙන්න බාධක ආවාත් දරුවන්ට ගෙදර ගෙනිහින් කියවලා ආයෙත් ගෙනත් දෙන්න මේ පොත් ලබාදීමේ වැඩසටහන පුළුවන් උපරිමයෙන් සාර්ථක කරගන්න පෙර පාසල් ගුරුවරියන් මහන්සි වුණා.

මේ පහත වීඩියෝව ඒ පෙර පාසල් ගුරුවරියෝ ගත්ත වීඩියෝ රැසකින් එකක් විතරයි. පොළොන්නරුවේ සිඟිති පෙරපාසලේ දුවෙක් පොතක් ගෙදර අරගෙන ගිහින් දෙමව්පියෝ එක්ක කියවලා, පස්සේ පොත ගැන විස්තර ගුරුවරියට කියන හැටි තමයි මේ තියෙන්නේ . අවුරුදු තුනක් වයස මේ පුංචි දුව පොතක පිටු පෙරලමින් දිග කතන්දරයක් කියන්නේ අකුරක්වත් කියවන්න දැනගෙන නෙමෙයි. ඒත් එයාට ඒ පොතේ කතාව හිතට කාවදින්න, මතක හිටින්න කියලා දුන්නු වැඩිහිටියෝ නිසා එයා කියවන්න ඉගෙන ගන්න කලින්ම කතාවක් රස විඳින්න ඉගෙන ගෙන. පින්තූර බලලා සම්පූර්ණ කතාවක්ම මතකෙන් කියන එක කොයි තරම් හපන්කමක් ද!

මේ වීඩියෝව පළ කළේ මේ දැරියගේ දෙමව්පියන් සහ ගුරුවරුන්ගේ අවසර ඇතිව, මේ සුන්දර දසුන බෙදාගන්නයි.

දරුවෝ පුංචි කාලෙම එයාලට පොත් පත් ළං කරන එක එක්තරා විදිහකට එයාලගේ ජීවිත කාලෙටම ආයෝජනයක්. පුංචි දරුවෝ ඉන්න දෙමව්පියන්ට මේ තරම් කල් ඒකට ඉඩකඩ ලැබුණේ නැත්නම් ඒ ගැන ආයෙත් හිතලා බලද්දී මේ චූටි දූවත් මතක් කරගන්න.

(ලංකාවේ කෙරෙන මේ පෙර පාසල් කියවීම් වැඩසටහනට අපි සම්බන්ධ වුණේ රටවල් තුනක ඉඳන්. මාත් එක්ක එකතු වුණු ශෂී සූරියආරච්චි, කුමුදු ඩයස් සොයුරියන් වගේම පොළොන්නරුවේ සුජානි මිරහවත්ත, තුෂාරි ප්‍රියංගනී, නෙලුම් සුසන්ති, තුෂාරි රාජපක්ෂ පෙර පාසල් ගුරුවරියනුත් පොළොන්නරු දිස්ත්‍රික් මුල් ළමා විය සංවර්ධන නිලධාරිනිය පවිත්‍රා වර්ණකුලසූරිය මහත්මිය යන හැම දෙනාම මේ වැඩසටහනේ සාර්ථකත්වය පිටිපස්සේ ඉන්නවා.)

මුල් සටහන -පෙබරවාරි 2021

https://www.facebook.com/helmalie.gunathilaka/posts/10158640789507550